როგორ შეიძლება ვინმე აშშ-ის დიპლომატიას ენდოს? - ამის შესახებ ირანის საგარეო საქმეთა სამინისტროს პრესსპიკერმა, ესმაილ ბაგაიმ India Today-თან ინტერვიუში განაცხადა.
„როგორ შეიძლება ვინმემ დაიჯეროს მათი განცხადებები დიპლომატიისა და შუამავლობის შესახებ, როდესაც ეს ომი მათ დაიწყეს და თავდასხმებს აგრძელებენ“, - განაცხადა ესმაილ ბაგაიმ.
მისი თქმით, ირანს „აშშ-ის დიპლომატიასთან ურთიერთობის კატასტროფული გამოცდილება აქვს“.
„ბოლო ცხრა თვის განმავლობაში ორჯერ დაგვესხნენ თავს, როდესაც ბირთვული საკითხის მოგვარების შესახებ მოლაპარაკებების პროცესში ვიყავით. ეს დიპლომატიის ღალატია“, - აღნიშნა ირანის საგარეო საქმეთა სამინისტროს პრესსპიკერმა.
ცნობისთვის, აშშ-ის პრეზიდენტმა, დონალდ ტრამპმა განაცხადა, რომ აშშ-სა და ირანს შორის მოლაპრაკებები მიმდინარეობს, ხოლო პროცესს აშშ-ის ვიცე-პრეზიდენტი ჯეი დი ვენსი და სახელმწიფო მდივანი მარკო რუბიო ხელმძღვანელობენ.
